Coat, Sweater, Scarf

Заримдаа эмэгтэй хувцас хэтэрхий гял цял, цацаг чимэг ихтэй санагддаг. Эрэгтэй хувцас энгийн, бөх, хэтэрхий анхаарал татахааргүй. Тиймдээ ч "Boyfriend жинс", Boyfriend сорочк" гээд эрэгтэй хувцасны нэлэмгэр характерыг тэр чигээр нь хадгалсан загварууд сүүлийн хэдэн жил хүчтэй гарч ирч байгаа. Зөвхөн эмэгтэй стилийн хувцасанд баригдалгүй, зөвхөн бариу, гялгар шигтгээтэй ягаан плате өмсөнө гэлгүй, янз бүрийн стиль, тэр тусмаа эгэл жирийн энгийн загваруудыг амилуулж, өмсч чаддаг эмэгтэйчүүд арай л өвөрмөц, өөртэй итгэлтэй харагддаг.

Хувцас гэдэг тухайн үеийнхээ мэдрэмж, цаг үед тааруулж байж дээд зэргээр амилдаг. Хэдийгээр эмэгтэйчүүд бид дэрэвгэр ягаан принцес стилийн плате дэлгүүрийн цонхонд хараад өөрийн эрхгүй алхаа удааширч хараа тогтдог ч, зөвхөн ийм төрлийн хувцас шүүгээг бүрдүүлж чаддаггүй. Энгийн, эгэл жирийн тусмаа өмсгөл ихтэй, тохирох газар ч өргөн, урт настай байдаг. Дан тав дахийн орой дискодох гэж байгаа юм шиг хувцаснуудтай, түүнийгээ жирийн үед ч өмсдөг бол дозыг нь хэтрүүлж байна гэж ойлгож болно. Эрэгтэй стилийн гэмээр элдэв чимэггүй энгийн хувцаснууд л шүүгээний гол аврагч байдаг. Хэд хэдэн энгийндүү, эсгүүр сайтай сорочк, ноосон цамц, ганц хоёр эсгүүр, материал сайтай цув, пальтотой бол моодноос хамааралгүй удаан өмсч чадна.

Сүүлийн хоёр жил эдийн засгийн хямралтай холбогдуулаад фэйшн ертөнц ерөнхийдөө энгийн, аль болох хүний анхаарал татахгүй, илт машины үнэ орсноо зарлаж буй мэт сүржин хувцас, логоноос татгалзсан хандлагатай байлаа.

Zeitgeist. Орчуулбал цаг үеийн уур амьсгал гэдэг герман үг. Нийгэм, цаг үеийн ерөнхий чиг хандлагыг энэ үгээр төлөөлүүлж хэрэглэдэг. Хямралтай холбогдуулан хүмүүс жирийн загвар, сулавтар өнгө, эсвэл бараан өнгийг илүүд үзэж логотой цүнхнээсээ ичих болсон. Бусад хүмүүс ажлаа алдаж байхад ганцаараа бүхнээс содон ямар нэгэн брэндийг рекламдаж явахыг хүсээгүйгээс тэр. Хувцас бол эцсийн эцэст тансаглал. Ихэнх бүсгүйчүүд шүүгээ дүүрэн хувцастай ч өглөө босоод өмсөх хувцас олдохгүйгээ гайхдаг. Учир нь тэдгээр хувцаснууд тань хэтэрхий гял цял юмуу таны жинхэнэ характертай тохироогүй, хэтэрхий хичээсэн, эсвэл "өнөөдөр"төй хол зөрсөн байдагтай холбоотой. Хүн бүр натурал өнгийн жирийн пальтог сонгож байхад, ганцаараа неон ягаан том том шигтгээтэй унжлага, цацаг болсон пальто өмсчихвөл цаг үеийн уур амьсгалыг ойлгоогүйгээ илтгэж олны харцны бай болно. Гэхдээ энэ нь та ийм характертай бол дуртай зүйлээсээ бүрэн татгалз гэсэн үг биш. Зүгээр дозыг нь багасгаж, энгрийн тэмдэг, бугуйвч, торгон алчуураараа өөрийнхөө гял цял талаа илэрхийлээд харин гол суурь хувцасаа цаг үетэйгээ тохирсон загвараар солиход л болно.

Эрэгтэй хувцас гэдэг харахад энгийн ч, энгийн тусмаа материал, эсгүүр, детайлыг нь бодолцсон байдаг. Яагаад гэвэл эрэгтэйчүүдийг ятгахад амаргүй, тэгээд ч тэд бидэн шиг үргэлж шинийг эрж хайлгүй, өөрт тохирсноо удаан өмсөөд сурчихсан байдаг. Тиймээс материал сайтай байх яалт ч үгүй эрэгтэй хувцасны гол шалгуур. Эмэгтэйчүүд бидэнд бол түрүү жилийн загварыг бага зэрэг хормой, энгэрийнх нь хэсгийг өөрчлөөд шуудайны материалаар ч оёод өгсөн ч яаж ийгээд, бусад зүйлстэйгээ хослуулаад амилуулж дөнгөх улс. Эрчүүд харин залхуу, тэгээд ч шинийг эрэлхийлэх дуртай биш. Тиймээс эрэгтэй хувцас ихэвчлэн дээд зэргийн энгийн атлаа удаан өмсөхөөр, цоо шинэ, гял цял харагддаггүй, дөнгөж өмсөнгүүт 10 жил өмссөн юм шиг харагддаг. Хамгийн гол нь биед шингэцтэй, тухайн хүнийг тэс өөр, гэнэт баяжсан юм шиг харагдуулдаггүй. Юу хэлэх гээд байна вэ гэвэл гял цял, гоё сайхан бүхэн удаан өмсгөлтөй, удаан хайрлаж өмсөхөөр биш байдаг. Харин хичээгээгүй хувцас илүү урт настай. Эрэгтэй хувцаснаас авах зүйл их бий. Тэгээд ч одоо Юнисекс буюу хүйс харгалзалгүй өмсөхөөр зүйлс олон болсон. Трэнч цув, сорочк, өмд, жинс, пиджак гээд л... Дараагийн удаа найз залуу юмуу нөхрийнхөө хувцасыг сайн ажиглаарай, тэгээд таалагдсан хувцасаа түр зээлээд өмсч үзээрэй. Бага зэрэг нэлмийлгээд зузаан ноосон цамцыг нь шулуун юбкатэй, эсвэл нэлмэгэр сорочкыг скинни жинстэй өмсөөд үзээрэй. Дан эмэгтэй, биед яг таг таарсан хувцаснаас хамаагүй эрх чөлөөтөй мэдрэмж төрдөг. Тэгээд ч арай күүл ч болчихсон юм шиг санагдах бизээ.

Margaret Howell F/W 10

Casual luxury - Margaret Howell

Luxury буюу тансаглал гэдэг зөвхөн гял цял, саа чимэг биш, харин дээд зэргийн материал, эсгүүр, бусдад баян тансаг харагдахын төлөө биш, өөрт хамгийн зохисон, биед эвтэйхэн, хүн бүр анзаархаар том том чулуун шигтгээ биш, зөвхөн өөрөө мэдэж инээмсэглэх жижигхэн улаан товч, цэцэгтэй дотор гээд жижиг детайлд байдаг гэж боддог.

Энэ философийг дээд зэргээр амилуулсан дизайнеруудын нэг бол Margaret Howell бөгөөд Английн casual luxury стилээрээ эгэл жирийн бүсгүйчүүдийг байлдан дагуулсан брэнд.
Өдөр тутам өмсөхөд биед эвтэйхэн, цэвэрхэн, классик, энгийн, хөнгөн, элегант. Margaret Howell анх эсгүүр сайтай сорочк цамцаар гараагаа эхэлсэн. Дизайнер нь ч өөрөө энгийн эмэгтэй байдаг.

Ер нь хэт их нүсэр чимэглэлтэй хувцаснаас илүү энгийн хувцаснууд эмэгтэй хүнийг залуу харагдуулдаг. Хөгшрөх, баяжих тусмаа энгийн байна гэдэг вкус сайтай-н шинж шиг санагддаг. Гэхдээ энгийн гэдэг нь юу ч хамаагүй өмсөх гэсэн утга биш л дээ. Бас шууд кет + жинс өмс ч гэсэн үг биш. Гоёл чимэглэл, байгаа бүхнээ максд нь тулгаж нэг дор өмсөх биш, энгийн цагаан сорочкоо үнэхээр материал сайтай юбка, ганц аятайхан цувтайгаа өөртөө тохируулж хослуулахыг жинхэнэ стиль гэх болов уу.

Миний хувьд нэг өдөрт нэг, хоёроос илүү (хэтэрхий) үнэтэй зүйл хэрэглэхгүй байхыг хичээдэг. Дизайнер брэндийн оёдол, фит, материал сайтай өмд өмссөн бол дээр нь энгийн даавуун хар хөх свитер хослуулах гэх мэт. Нэг дор хэтэрхий олон дизайнер брэнд ч юмуу гял цял, манайхаар бол бүх цайны хувцасаа өмсчихөөр хэтэрхий хичээсэн харагдана, дээр нь хүчтэй акценттай хувцаснууд бол хоорондоо харшилдаад аль алинаа сайхан харагдуулахад саад болно. Тиймээс нэг удаад нэг л цайны чамин хувцасаа оруулж, бусдыг нь аль болох энгийнээр суурьлвал өдөр тутамд илүү тохиромжтой. Тэгээд ч хэтэрхий хичээх вкус муутай харагддаг, ялангуяа илт мэдэгдэж, өөрт зохиогүй байвал. Тэгээд ч гэнэт баяжсан юм шиг гоё сайхан бүхнээ нэг дор өмсөх онц биш. Ингээд олныг нуршилгүй Margaret Howell-н загвараас сонирхоцгооё.

( Spring /Summer 2009)

дизайнер Margaret Howell

Lifesaver

Алчуур бол миний хамгийн дуртай аксесуар. Өглөө яарч байгаа үед авч гараад, замдаа толгой дээрээ бантик зангидаж боох ч юмуу, эсвэл хүзүүндээ уячихад ямар ч энгийн хувцасыг амьдруулчихдаг.

Мөн бараан, цулгай хувцас өмссөн үед өнгө, хээ нэмээд акцент болно. Хамгийн амархан, чамин мөртлөө тэр өдрийнхөө стильд тохируулаад хөгжилтэй, классик гээд ямар ч байдлаар зангидаж болно.

Age is not important.

Сайхан харагдахад нас чухал биш.

• Өөрт юу зохихоо мэдэх,
  
• зөв posture ( нуруу цэx)
• биеийнхээ хэлбэрт тохируулж хувцаслах.
• Зөв аксесуар сонгох.
• Нас ахих тусам сайн материал хэрэглэх.
• Хамгийн гол нь сайхан харагдах гэсэн эрмэлзэл + Инээмсэглэл.
  

Саарал + Цэнхэр

Best & Worst of the UBS Music 2009

Энэ жилийн UBS Music awards-н улаан хивсний ёслолын ажиллагааны хувцаслалтаас хүргэж байна.

Best:

Мишээл, Мөнгөлдэй.

Мөнгөлдэй бусдаасаа хамгийн өвөрмөц, стилтэй, өөртөө итгэлтэй харагдсан. Шар үс ихэвчлэн Ази бүсгүйчүүдийг хямд харагдуулдаг ч, харин энэ удаа маш дэгжин харагдаж байна. Шар үс, хагас ил гарсан мөр нь гол акцент нь болж олон өнгө холилгүй хараар суурилсан нь гол акцентаа тодруулсан байна. Зөвхөн гутлаараа бага зэрэг саа оруулсан нь ч доз таарч, бусад шивээс, үс, мөр, нүүрний будалтаас нь анхаарал сарниулахгүй хэрнээ сонирхолтой харагдаж байна.

Мишээлийн хувьд рок стилийг барьсан ч хэтэрхий хөлөөс толгой хүртэл нэг стилээрээ хичээсэн санагдлаа. Бага зэрэг өөр стилтэй холисон бол илүү дээр байлаа. Гэхдээ дажгүй ээ. Нэгэн хэвийн байснаас л дээр. Заавал секси харагдах гэж хичээснээс өөрийнхөөрөө байх нь хамаагүй оригинал.

Сүндэрьяа. Зөв пропорцтой хувцасласан байна. Улаан өнгөө гол акцент болгож бейж цуваар тод улаан өнгөө зөөллөсөн байна. Мөн уруулын будгаа платетайгаа хослуулсан нь дэгжин харагдаж байна. Уруулын будаг, плате-н өнгөө хослуулах амилуулахад хэцүү ч, гоё зохисон байна. Мөн гутал цүнх зэрэг аксесуараа хараар хослуулсан нь улаан өнгөнөөсөө анхаарал сарниулахгүй ч, ижил жин эзлэж харагдаад сайн сонголт болжээ. Сүндэрьяа өөрийн гэсэн стиль гэж юу вэ, өөрт юу зохих вэ гэдгээ мэддэг цөөхөн бүсгүйчүүдийн нэг. Залуусын хувьд баруун захад нь байгаа залуу стилтэй, зөв пропорцтой харагдаж байна.

Болд. Баяр ёслолд тааруулж хувцаслаж чаддаг байна гэдэг том соёл. Костюм пиджактай залуусаас Болд л ганцаараа биедээ тохирсныг сонгож чадсан байлаа. Хар эмжээртэй түксидө пиджак, мөн хар лакан гутал нь үнэхээр чамин байлаа. Харин шил нь бага зэрэг анхаарал сарниулж байна. (Хэд хэдэн залуучууд хэтэрхий урт өмд өмссөн байсан.)

Эршүүд стиль буюу Annie Hall стиль өөртөө итгэлтэйн шинж. Эмэгтэй хүн заавал секси байдлаараа зэвсэглэх гэж дайрах хэрэггүй. Нууцлаг, үргэлж сонирхолтой байх тусмаа ухаалаг, үнэтэй харагддаг.

Цэвэрхэн, натурал= Дажгүй. Өөрийнхөө биеийн хэлбэрт тохируулж хувцасласан байна. Хөл, мөр гээд сайхан хэсгүүдээ тодруулж харуулсан загвар сонгожээ. Хэт будсан бүсгүйчүүдийн хажууд эрс ялгарч харагдаж байлаа. Бүсгүйчүүдийн хамгийн том алдаа бол хэтэрхий хичээсний дүнд хэтрүүлж будах. Ялангуяа бөөн пудр гялалзах онц биш.

Классик = Дажгүй. Ашгүй зарим нь ч гэсэн олон жил амьсгалсан Хип Хоп стилээсээ салж байх шиг байна. Хип Хоп бол хамгийн хямд харагдуулдаг, өмсөхөд хэцүү, ялангуяа монголчуудад ( Азиудад) хамгийн зохидоггүй стиль.

Lemons. Монголдоо хамгийн стилтэй залуучуудын хамтлаг. Хувцасны хэлбэр, хослол, өөрт юу зохихоо бүгд маш сайн мэддэг.

Neutral:


Сонирхолтой л юм. Янз бүрийн өөр урсгал орж ирнэ гэдэг хөгжиж буйгийн шинж гэж боддог. Хэдэн жилийн дараа энэ стилээ арай формал болгож сурна биздээ.

Трэнч цув энгийн үед сайн сонголт ч, энэ удаа хэтэрхий жирийн харагдсан. Гэхдээ ямар ч байсан нэг их хол зөрсөн буруу харагдаагүй. Тэр нь трэнч цувны гол ид шид. Харин силк, сатин ч юмуу гоёлындуу материалтайг сонгосон бол илүү арга хэмжээндээ тохирсон байх байлаа.

Секси гэж хамгийн бага материал орсон плате дээр, хамгийн өндөр өсгийтөө өмсөнө гэдэг түгээмэл ойлголт боловч заавал тийм байх албагүй. Өөр олон аргаар, ухаан зарж секси-г илэрхийлж болно. Гэхдээ тийм ч муугүй ээ. Залуу насандаа тохирсон байна.


Классик хувцас орчноосоо, мөн юутай хослуулснаас хамаарч заримдаа уйтгартай болох гээд байдаг.Яг ийм урттай мини бол харьцангуй өмсөхөд хэцүү загвар. Мөн биений өнгөтөи трико их овортой харагдуулдаг, ялангуяа мини юбкатай хослохоороо. Хар трико, хар цамц өмссөн бол минигээрээ акцент болгох байлаа. "Бүсгүй заяа" клипэнд дан сул цагаан цамц өмссөн нь бусад нэгэн хэвийн хувцаслалтаас ялгарч харагдаж байсан шүү.


Worst:


Энэ загвар улам том цээжтэй харагдуулж байна. Ер нь цээжиндээ акцент өгөх онц биш. Ялангуяа тодорхой нас өнгөрсөн, загвар өмсөгч шиг биетэй биш л бол ингэж цээжээ ил гаргах ч юмуу, акцент өгсөн хувцас онц биш. Мөн плате, цүнхний өнгө тохирсонгүй. Логотой цүнх бүх хувцасан дээр зохидоггүйн жишээ.


Арга хэмжээ, насандаа тохируулж хувцаслах бас л хувцаслалтын соёлд тооцогдоно. Хэтэрхий залуу хувцас сонгожээ.


Хэт их саа, чимэгтэй хувцас өмсөхөд хэцүү хувцаснуудын нэг. Ялангуяа модел шиг биетэй биш бол, биеийн өөг тодотгож харуулдаг.


Овоолсон үс, унжсан ээмэг, урт зүүлт, дотуур цамцны тод эмжээр, өвдөгнөөс доогуур өмдний пропорц, өмдний эмжээр гээд анхаарал татах элемент хэтэрхий их орсон тул, гол акцент хаана байгаа нь мэдэгдэхгүй, замбараагүй харагдаж байна.


Нүд, уруулаа зэрэг тод будаад, цээжээ ил гаргах рисктэй хувцаслалт. Нүд, уруул хоёрынхоо аль нэгийг нэгнээс нь тодруулж будвал арай дээр байлаа. Харин платены өнгө аятайхан зохисон байна.


Энэ хээний пропорц буруу байна. Буруу газраа акцент өгсөн, хэтэрхий нүд эрээлжилсэн хээ байна. Хүний анхаарлыг хэтэрхий доошоо хандуулах нь хямд, бас намхан харагдах аюултай. Мөн энгэр дэх дугуй детайл, саа зэрэг нь, хэтэрхий анхаарал татсан хээтэй, платены урт зэрэг элементүүдтэй харшиж байна. Гэхдээ гурвуулаа ижилссэн нь дажгүй байлаа.

45-тай гэмээр хувцаслажээ. Хэд хэдэн залуу зүүсэн байсан ч харанхуйд хар шил тийм ч зохимжтой биш.

Зургыг сонин.мн, сүүдэр.ком-с.